Ananı çox istəyirsən, ya atanı?
3 Okt, 2017
Aynur Xankişiyeva
Aynur Xankişiyeva
451

Ananı çox istəyirsən, ya atanı?

Yadınızdadırmı, uşaq olanda qohum-əqrəba yığışardı və qonaqlığın ən qızğın yerində bir nəfər sizdən soruşardı ki, “kimi çox istəyirsən, ananı ya atanı?”. Bu sualı bizə dəfələrcə versələr də, hər dəfəsində qəribə hiss keçirərdik. Necə aralarında fərq qoyaq ki, hərəsinin öz yeri var axı...

İllər keçir və bu sual aktuallığını itirir, amma mənim üçün digəri peyda olur: sosial mediada reklam yaxşıdır yoxsa Google-da?
Google reklamları ölkəmiz üçün nisbətən yeni olduğundan müştərilərin bu sualı əslində məni narahat etmir. “Boş şeydi o” deyənlər məni məyus edir, amma bu haqda bu gün danışmayacağıq :).

Gəlin ilk öncə onların aralarında olan fərqlərə baxaq.

Kontekst Google reklamları xidmət və ya məhsulla maraqlanan, potensial müştərilərə yönəlib. Bu istifadəçilər məhsulu almaq istəyirlər, lakin kimdən alacaqlarını hələ bilmirlər. Uzun sözun qısası, onlar özləri sizi axtarır.

Sosial mediada hədəflənmiş reklam isə həm potensial, həm də müəyyən parametlərə uyğun gələn potensial müştəri ola biləcək istifadəçilərə yönəlib. Kontekst reklamla müqayisədə, reklamı görən istifadəçilər hal-hazırda reklam olunan məhsula/xidmətə qarşı maraqlı olmaya bilərlər.  

Bu iki reklam növünü bu cür xarakterizə etmək mümkündür: “axtarış sistemində məhsulu/xidməti açar sözlərlə axtaran şəxslər” və “sosial mediada istifadəçilərin məlumatlarına əsasən verilən reklam”.

Sizə hansı reklam uyğundur?

Qeyd edim ki, bunun konkret bir cavabı yoxdur, çünki hər bir mütəxəssisin bu dilemma üçün öz şəxsi fikri mövcuddur. Eyni zamanda hər bir məhsul və xidmət individual olduğundan hərəsi üçün özəl strategiya yaradılmalıdır. Aşağıda sizinlə müşahidələrimin və təcrübəmin əsasında çıxartdığım nəticələri paylaşacam.

Kontekst reklamı:

  • Məhsul və ya xidmətə olan tələb artıq formalaşıb. Onlar uzun zamandır ki, bazarda mövcuddur və istifadəçi nə aldığını bilir, amma kimdən alacağı hələ məlum deyil.
  • Hədəf kütləniz çox genişdir və siz müştəri portretini aydın görmürsünüz (yaş, cins, maraqlar və s.) Bu cür hal, biznesi müxtəlif insanlara yönələn şirkətlərdə ola bilər (məsələn ev təmiri, tibbi xidmətlər və s.)
  • Təklif etdiyiniz məhsula və ya xidmətə olan tələbat birdəfəlik və ya nadir hallarda baş verir (məsələn: ev, bağ evinin alqı-satqısı)  
  • Çox kiçik hədəf kütləsi olan şirkətlər (Məsələn: B2B sahəsi) Bu cür xidmətlərə müəyyən açar sözlərə uyğun reklam verilməsi məsləhətdir.
  • Çox bahalı xidmət satılırsa (elit avtomobillər və ya çox bahalı turlar). Əslində onları sosial media vasitəsi ilə də tanıda bilərsiniz, yalnız büdcənizin boş yerə axması da istisna olunmur.  
  • Xidmət və ya məhsullarınız sosial mediadan sifariş olunmur. Bu adətən dar ixtisaslaşmış şirkətlərə aiddir (Məsələn: şifer satışı, kondisioner ustası və s.).

Sosial mediada reklam:

    ·         Məhsul və ya xidmətə olan tələb formalaşmayıb (həmin region üçün və ya ümumiyyətlə yeni məhsul). İstifadəçiləri onlarla tanış etmək və ətraflı izahın verilməsi lazımdır;

·         Satmaq istədiyiniz məhsulun qiyməti baha deyil və böyük kütləyə maraqlıdır. (məsələn: aksesuarlar, yeni il suvenirləri və s.);

·         Tədbirlər və konsertlərin tanıtımı və biletlərin satışı;

·         Məhsulunuz və ya xidmətiniz emosional satışlara malikdirsə (məsələn: güllər, qadın geyimləri və s.)

·         Müştərinizi çox yaxından tanıyıb onun portretini təsvir edə bilirsinizsə (məsələn, idman qidaları).

Öncə də qeyd etdiyim kimi, hər bir məhsul/xidmət özəldir və individual yanaşmaya ehtiyacı var. Bu səbəbdən test etməkdən çəkinməyin və ən effektiv olanı təyin edin. Büdcəniz yetərli deyilsə, onu bölmək əvəzinə bir istiqamətə yatırtmaq daha düzgün olar. Əgər büdcəniz kifayət qədərdirsə, o zaman hər iki kanaldan səmərəli istifadə edib daha böyük nəticə əldə edə bilərsiniz.

Sizə ən uyğununu təyin etdikdən sonra sonda almaq istədiyiniz nəticəyə uyğun olaraq məhsulunuzun rəqəmsal strategiyasını yaradın. Bunun üçün çox zamanınız və büdcəniz getməsin deyə bu sahədə çalışan mütəxəssislərə müraciət etməkdən çəkinməyin.